Senin, 08 Agustus 2011

Poma Ngon Ayah

Poma ngon ayah teulhee ngon guree
Ureung nyan ban lhee meubak ta dhot-dhot
Meunyo na salah meuah talakee
Peumiyub ulee tacom aneuk teuoet

Watee geutanyoe masa lam kandong
Poma nyang tanggong mandum derita
Saket lam tuboh sampoe lam tuleung
Oh kaseb buleun meutarong nyawa

Bak saboh jamok poma meulet-let
Bak saboh pijet poma meujaga
Dua thon punoh ASI katajeub
Tan pre meu siblet geulake doa

Guna diayah ingat rakan lon
Gop yan yang tanggong lam rumoh tangga
Geujak hareukat di rumoh geu troen
Abek sagoe dum geujak useuha

Ujeun ngon badee lam uro tutong
Ladom meutarong ngon bakat raya
Demi beu eek na keu breuh siaree
Bah tuboh lapee mana geukira

Ureung peuturi tanyo Alah Baa
Ureung peuraba haleu ngon hareum
Ureung peu ija tanyo meubaca
Nyang peu blet mata cara meuhitong

Guna diguree han eek takira
Ayah ngon poma han eek tabileung
Ingat hai aneuk bek roh durhaka
Beuget tajaga sopan ngon santon

Seulaweut Nabi

Subohlah nyata laher nya nabi,
Seumpurna malam seumpurna nabi.
Tinggilah rasul leubeh that manyang,
Peutunjok jalan dilalam nabi 2x.

Gedong mulia pang ulei nikmat,
peutunyok umat syariah nabi.
Tinggilah bangsa leubeh martabat,
dum ureung arab jak khadam nabi 2x.

Tundoklah kayei tutoelah batee,
beukahlah buleun isyarat nabi.
Jibrail datang malam isra’,
tuhan hadharat yue hadir nabi .

Capai mulia Allah neu ampon,
nibak awai phon ke umat nabi.
Nabi Muhammad pang ulee tanyoe,
mulia tanyoe ijabah nabi 2x.

Ya Allah…di ateuh nabi Muhammad,
neu tamah rahmad dan saleum
Di ateuh wareh mandum sahabat,
seureta bandum umat iselam

Neubri keu kamoe iman beutetap,
dalam ibadat Allah ya tuhan 2x
Neubri keu kamoe beuroh lam taat,
neubri seulamat iman lam dada

Neubri beu matee kamoe lam rahmat,
malam jum’at buleun ramadhan
Neubie jeut rateb ‘oh wate sukret,
lam kubu bejeut nebri jawaban

Deungon beurekah nadam seulaweut,
beujroh ‘itikeut lam dinun islam
Neubri beu leupah kamoe bak titi,
beusajan nabi janjongan alam

Neubri kamoe jeb ie kulam nabi,
neu buka gunci pinto syuruga
Syuruga lapan neubuka kunci
keu umat nabi yang tem sembahyang

Dalam syuruga na mon hayati,
budiadari manoe didalam
Kadihayak ok sampoe u gaki,
bak dikasyuk ie syamsyum bambum ban gendrang

Minggu, 07 Agustus 2011

Aneuk Gunci Syuruga

Saleuem lôn direue do’a lôn bagi
keu bamdum akhi tuha ngön muda
pujoe keu Allah seulaweuet keu Nabi
nyang bri raseuki nikmat syuruga

bacut lôn canèk ca-é minggu nyo
keu bandum tanyoe umat Iseulam
udép lam dônya bèk sampé rugoe
meuseubab laloe keu hukôm Tuhan

‘oh watè tawoe tanyoe bak Tuhan
dua tujuan syurga nuraka
meunyo meukeusud meutuah badan
beuna hai taulan gunci syuruga

lam kitab hadih haba geurawi
muhammad Nabi peugah bak umat
tamöng syuruga na nam neuk gunci
soe nyang padoli teuntèe seulamat

peugah ubé buet pubuet ubé na
keurija beuna haba bèk sulét
meunyô manusia jujô tan lé na
akhérat dônya teuntèe meupalét

janji bèk mubah amanah bèk meutuka
peuglah beusigra peutrôh bubagah
bèk sampé tuwö gata ceulaka
lam apui raya meukuah-kuah

pharöt tajaga syahwat bèk luhu
tatheuen hai alu birahi gata
bèk teupeungarôh pilem ngön lagu
atawa hantu di alam maya

mata bèk teusuet kalön buet jahé
bèk laloe até péasan dônya
taglip Quru-an tapeutrang até
ulè beusabé piké agama

jaroe bèk cabak rahôb ata gob
reubah lam leuhob hana soe hila
asoe teuh durôh darah teuh meulhob
akhé geutinthob dalam nuraka

sép ‘ohnoe dilè ca-é lôncanék
haba dari nék asai bak Nabi
beu-ék tapubuet adak rayek hèk
syurga meutipèk teuhah Tuhan bri